Lauba bajtlom

...now browsing by category

Teksty dlo dziecek dużych i małych:-)

 

Fojerman – O piesku, co poszol do frizjera

czwartek, Maj 6th, 2010

2010.02.04

O piesku, co poszol do frizjera

Piesek do frizjera poszoł:
- Sam przinosza Wóm dwa grosze.
Włosy krótko ostrzic prosza,
bo nie rod te kudły nosza!

Dziwo sie frizjerka młodo:
- Takich piyknych włosów szkoda.
Przeca tako je psio moda.
Dyć, kej płacisz, nó tóż – zgoda!

Dziwo się pies do zdrzadełka,
chudy biydny, bez futerka,
a za oknym zamiyć wielko,
tóż trza szukać mu cwiterka.

Trefiół psa kajś kocur stary
I nadziwić sie niy może:
- Tyś sie ostrzig? Nie do wiary!
Tak bez zima? O tej porze?

Przeca wiedzóm wszystki dzieci:
w zimie w gruby mantel wlyź,
jak bez lato słóńce świyci,
wtedy se zrób modny friz.

Fojerman

Posted in Fojerman, Lauba bajtlom | Komentarze są wyłączone

Lauba bajtlom – Ło zajoncach kere czakały na wiosna

poniedziałek, Listopad 9th, 2009

Ło zajoncach kere czakały na wiosna

Zajonc z cołkom familijom

we lesie pod drzewym sosny,

tak już łod wczora wieczora

czakajom na przijści wiosny.

Chocioż śniegi na polanie

a i stow tyż skuty lodym,

wichura ta beskuryjo

straszy yno nocnym chłodym.

Prziszła wiosna skondś z daleka

prziniosła kosz z geszynkami,

wszystkim dała coś fajnego

potym poszła z zajoncami.

Bo łone na nia czakały

i na szpacyr zaprosiły,

po miedzach, polach i lesie

wiosna wartko łokludziły.

Pokozały wszystki gniozda

i ptokow kadubki nowe,

a to po to, żeby mogły

ptoki chować dziecka zdrowe.

Zaglondały tyż we dziura

kaj myszy fest rozrobiały,

i do ryszawych wewiórek

kere jeszcze w dziupli spały.

Potym pogodały z wiosnom,

żeby ło nich pamiyntała,

i wszystkim zwierzontkom w lesie

jak mogła tak pomogała.

Kejby dała im słoneczko

i dyszczyk z nieba spuściła,

kery podloł by polana

coby sie zazielyniła.


Renia

Posted in Lauba bajtlom | Komentarze są wyłączone

Wszystkie elementy graficzne, zdjyncia i teksty som chronione prawym autorskim należoncym do ich autorow!!!