Zgniyły Zajonc i robotne Anioły ( pszowscy wikarzy).

Zajonczek sie niy chyto roboty:
Wcino modro kapusta, rolada.
Musi za niego przez poł soboty
Gyszynki nosić – Aniołek Adam!

Byś sie Zajonczka niy doprosił
Bo tak po prowdzie nic sie niy staro.
Gyszynki bajtlom wdycki przinosi
Dzielny wojownik – Aniołek Karol!

Anioł se furgo bo mo krzidełka
W jedna sekunda gno z kilomyjter.
Prujonc  z gyszynkiym ścignie orełka
Taki je wartki – Aniołek Pyjter!

Niy dźwignie miecha jak ni mo ronczek
I tłumacz małym Krzysiom i Madziom,
Że gyszynków niy nosi Zajonczek
Yno pulchniutki – Aniołek  Radzio!

Jan Kaintoch – Wielkanoc 2010

Jezusku, słoneczko…

Jezusku, słoneczko,
Topisz serca z lodu.
Mlyczka dom Ci deczko,
Cobyś ni mioł głodu.

Jezusku, serduszko,
Dziecino malutko.
Chronia Cie pieluszkom,
Cobyś mioł suchutko.

Jezusku, kruszynko,
Nojmilejsze kwiotko.
Tula Cie pierzinkom,
Cobyś nynoł słodko.

Jezusku, Ty lyczysz
Kożdo ziymsko haja.
Nasze krziże smyczysz.
Wiysz jak jo Ci przaja!

Janek Pszów Staro Maszyna  Boże Narodzenie 2009

W Betlejym je ciepło…

W Betlejym je ciepło, choć grudziyń,
Bo Gwiazda fest błysko znad szopy,
Zwiastuje nowina ło cudzie.
A nom marznom rynce i stopy.

W Betlejym je ciepło, choć zima.
Skłodajom fojera pastuszki,
By w żłóbku niy zmarzła dziecina.
A nom marznom nosy i uszki.

W Betlejym je ciepło, choć nocka,
Bo cołko stajynka jaśnieje.
Jezusek rozdowo Łask mocka.
A u nos za łoknym zawieje.

Choć zima, mroz czasko, śniyg leży,
Nom może być ciepli, choć wieje:
My yno muszymy uwierzyć,
Że Bóg sie narodził w Betlejem.

Boże Narodzenie 2005 – Jan Kaintoch

Ślimoki wandrujom do nieba

Do Ciebie ślimoku

Tyż  Pon Jezus przidzie.

Jak żeś żył po ćmoku,

Świyntym zaroz bydziesz.

I do Ciebie frelko

Dzieciątko zawito.

Niesie radość wielko,

A staranie cito.

Dzieciątko Ci tysionc

W sercu gwiazd zapoli.

Cobyś przoł Hanysom,

I kochoł goroli.

Boże Narodzenie 2002 – Jan Kaintoch

Sanki i szlynzuchy

Jak już sie Pon Jezus narodzi

Wyciongna se sanki z pywnicy,

Pon Jezuska w blasku powodzi

Powoża na naszyj ulicy.

Pokiełzomy sie na szlynzuchach

A że lod je gładki jak glaska

Do galot Mu wcisna poducha

Ni może mi sie za fest szczaskać.

Dyć nic sie Dzieciontku niy stanie

W szalyńsytwach na śniyżnym kobiercu

Niy grozi Dzieciontku szczaskanie

Bo sztyjc Go nosza w swym sercu.

Boże Narodzenie 2001 – Jan Kaintoch

Biyda w stajynce.

Biyda w tyj stajynce,

Na cwibak niy styko.

Kończy sie chlyb w skrzince

I w boncloku mlyko.

Deka bez oblyczki,

Ni ma tyż ausgusa,

Ani  ni ma ryczki,

Biyda choby w Rusach.

Nasz Józef ubogi

I Maryja skromno.

Bose majom nogi -

A miłość  łogromno.

Dyć i bez majontku

Chude lata minom.

Majom skarb w Dzieciontku!

Bóg niy do im zginońć.

Boże Narodzenie 2006 – Jan Kaintoch