CUBUS – karlus z Tychów

Dyć to JO…

Mom czorne kudły i nosza brele

Bystry karlus, niy gupie ciele

Inteligyntno na gymbie afa

Kark jak noleży, niy jak żyrafa

Niy podany do Harrego Pottera

Muskli niy mom Schwarzenegera

Jeżdża se na kole jak yno mom czas

Dycki mom uciecha, robi to szpas

Jo niy słuchom fulanio gupigo

Jak ftoś szpetnie godo na drugigo

Fest wymyślaty skuli jydzynio

Lubia spokój i trocha skupiynio

Godajom: szpyndlikorz do przesady

A porzondek to jego zasady

Cubus

COŁKO PRAWDA…

Jes wieczerzo, łopłatek i życzyń moc
Potym na pastyrka w ta świynto noc

Kolyndy śpiywomy czyńścij z płyty, rzadzij z gowy
Pod choinkom czeko gyszynk, mnij lub bardzij przipadkowy

Nastympne dwa dni, cowiek we chałpie spyndzo
Durch jy, pije – wontroba w stresy wpyndzo
Czasym idzie na szpacyr, abo na kolyndowanie
Som tysz tacy co wolom wylygiwanie

Co dzisioj ze Świont nom łostało?
Smutek, że wszyjstko tak krótko trwało
Jedni już wyzwolyni ze świontecznyj rozgrzewki
Inksi patrzom do pustyj sakiewki

Przeca Gody u nos łod wieków w swojij tradycji majom
Wzmacniajom ducha, zdrowie – a kapsa osłabiajom!

Cubus

GLORIJA, GLORIJA…

Glorija, Glorija…

Narodziła synka Paniynka Maryja

Na krzipkach aniołki grajom piykne melodyjki

Wszyjscy drapko do betlyjki

Pastyrze z łowieczkami

Trzi Króle ze Wschodu z gyszynkami

Wielgo radość skuli tego

Niych tyż zapuko do serca Waszego

Na te świynta i na bez rok

Niych Wom szczynście pojaśni cołki życia ćmok

W kożdyj ślonskij (niy yno) familiji

Bydźcie dycko sobie mili

Przi śniodaniu, przi wieczerzy

Niych chlyb zawdy przi Wos leży

We zdrowiu, we miłości

Żyjcie dzisioj i w prziszłości…

Cubus

MOI RZYKANIE

Miano Łojca, Syna, Ducha

Zarozki wtula sie w miynko poducha

Yno podziynkuja Ponboczkowi

Łon pomogo mje – karlusowi

Za zdrowie cołkij familiji

Za uciecha z kożdyj chwili

Za dziyń piykny – szczynśliwy

Za to żeś tak miłosierny – dobrotliwy

Ty podpowiadosz kiej mom pedzieć stop

Ty wiysz, że jo jes równy chop

Ty mje osłaniosz zawdy

Ty chcesz bych niy citoł łod prowdy

Jo sztyjc pamiyntom żeś przi mje obecny

Jo wiym kamracie Wszechmocny

Jo Twoji miano dycki chwola

Kożdy dziyń niy yno jak lygom do prykola…

AMYN

BIOŁY TYDZIYŃ

Na wierchu kaj klara jes blisko

I śniega leży ze dwa metry

Kaj czasym fest wydmuchowisko

Tam trza łoblykać rube cwitry

Pacza na alpejsko kraina

Na niebie niy ma żodnyj chmury

Podziwiom ta bioło pierzina

Te srogie austryjackie góry

Gryfne tukej narciarskie trasy

Fto jes zmynczony mo ławeczka,

Leżak, widokowe tarasy

Przi tymu szluknie se piweczka

Trefisz Niymca a tam Poloka

Rozmajtyj godki se posłuchosz

Holyndra, Czecha i Italoka

Świyżego luftu sie nadychosz

Urlop w Alpach to je pjykny czas

Już zaś musza Euro szporować

Bo fest kosztuje tyn bioły szpas

Coby na bezrok tysz szusować

Czamu to yno tydziyń trwało?

Zdjyncia… to mje z rajzy łostało!

Cubus

Dycki byda Cie pamiyntoł…

Byłaś gryfno i wspaniało

Jo podziwioł postać Twojo

Czamu to tak krótko trwało

Dyć pamiytom byłaś mojo

W mojij gowie kształt Twój wiotki

Jak szrama na szkle

Miykki jak futerko kotki

Jak janioł we mgle

Yno Tyś trud mój doceniała

Ciynżki wysiłek mojij pamiynci

Yno Tyś uczciwie łosondzała

Prawdziwe wyniki – moji chynci

Szczynściy mje dowałaś

Spomna kiejś piykne czasy

Kiej marzyniy moji spełniałaś

I zdowołech do nostympnej klasy

Na studiach Cie niy doceniajom

Przez wszyjskich wyszydzano

Profesory i dochtory oblewajom

TY… DWÓJO ukochano…

Cubus