2010.03.16

Program

Jo dycko słyszoł, że „z urzyndnikym sie nie wygro”, bo „urzyndnik je najważniejszy”, a sam się ostatnio pokozało, że je „ktoś”, kto poradzi wygrać z urzyndnikym. To je „program” kómputerowy. Z urzyndmikym możno nie idzie wygrać, ale idzie sie powadzić, a  programowi ani urzyndnik nie poradzi dać rady.

Mioł żech ostatnio zapłacić podatek za chałupa. Podatków żodyn nie chce płacić, ale kej trza, to trza. Do zeszłego roku trza było jechać do urzyndu, do kasy, stoć pół dnia, co by szło zapłacić, ale teraz je „program”, tóż ni ma z tym problymu. Wszystko je we kómputerze, kożdy mo swoj kod, je numer kónta, tóż idzie zapłacić jako sie chce i kedy sie chce, choćby bez internet.

Nó ja, ale przeca ni może być za prosto. Jo móm chałupa na pół ze siostróm, tóż dycko my dostowali jedna decyzjo, ale na tym stoły dwa nazwiska. Latoś decyzjo dostoł żech yno jo. Przeca to ni ma nic takigo, bo poradzymy podzielić to na pół, tóż sie dogodómy. I sam sie mylicie. Siostra we swojij połówce wynajmuje lokal znajómym na dzialalność gospodarczo. Sama nie prowadzi dzialalności, a podatek płaci dużo wyższy, tóż ta różnica może se odliczyć od dochodu. Nó ja, ale jako odliczyć se podatek, kerego óna nie płaci, bo ón je na mie.

Jednak trza jechać do urzyndu. Piyrszo sprawa: kaj sam zaparkować? Je 15, tóż pół miasta przijechało zapłacić podatek. To nie szkodzi, że idzie zapłacić na poczcie, w banku, bez internet, to nie ważne, że idzie zapłacić dwa dni przed, abo dwa dni po (urzónd nie biere odsetek za te pora dni), przeca pisze : termin 15, tóż wszyscy ruszyli i stojóm po pora godzin przed kasami. Je jeszcze dyscyplina w narodzie:)

Na szczynści jo nie stoja w tej kolejce, ale ida do biura zmierzić sie z urzyndnikym i z” programym” Urzyndniczka grzecznie tłumaczy, że majóm nowy program i tam mo zaznaczóne, że posłać decyzjo piyrszymu współwłaścicielowi. Jo tłumacza urzyndniczce, że siostra potrzebuje mieć kwitek na siebie, że óna zapłaciła podatek. Tóż trza zmiynić „decyzjo”. Nie styknie zapłacić na siostra, bo Urzónd Skarbowy może chciec widziec decyzjo. Coby zmiynić decyzjo, musza jechać po siostra, bo óna musi odebrać ta decyzjo. Do godziny sóm my nazod, drugi roz trza płacić za parking, tóż już by my mieli na te opłaty na poczcie.

Teraz zaczyno sie walka z programym. Tłumacza babie,  że styknie yno dopisać nazwisko siostry na tej decyzji. Ale kaj! Przeca my nie sóm małżyństwym, tóżz ni mogymy być na jednej decyzji dokupy. Dwanoście lot tak my dostowali te decyzje i mógło być. Ale nie było wtedy programu. Żeby wydać nowo decyzjo, to piyrsze trza staro anulować. Pół godziny klikanio, pisanio i w kóńcu się udało. Teraz trza wydać nowo decyzjo. Godóm babie, że styknie jedna na siostry, bo jo już móm swoja. Ni ma szans! Program sie na to nie zgodzi. Muszóm być dwie decyzje, do kożdego osobno. Moja bydzie idyntyczno z tóm staróm, bo przeca nazwisko było na mie, a inksze dane sie też nie zmiyniom. Siostra dostanie ta sama decyzjo ze swojim nazwiskym. Tóż możno chocioż tych kwitków do płacynio nie trza drukować. Na decyzji wszystko pisze: adres urzyndu, numer kónta, kod podatku, wielkość, terminy płatności, tóż jo to bez internet se zapłaca. Ale przeca je program. Z nim jeszcze żodyn nie wygroł, tóz kwitki muszóm być wydrukowane. Mój je taki sóm, jak tyn anulowany, a od siostry mo nazwisko inne yno. Żeby było śmiysznie, to na decyzji pisze, że wszyscy  współwłaściciele dostowajóm podatek naliczóny w pełnej wysokości, a może zapłacić jedyn, abo oba w dowolnej proporcji. Tóż: jak zapłaci jedyn, to drugimu te kwitki nie sóm potrzebne, jak zapłacóm kożdy po trosze, to kwitki tyż sóm do wywalynio, bo na nich stoji kwota całego podatku i trza wypisować inksze kwitki. Ale „pan program” nie do sie przekónać i drukuje, jak leci z wiyrchu na dół.

W kóńcu – jest. Udąło sie. Mómy nowe decyzje. Ale to przeca nie znaczy, że już je kóniec. Decyzje trza odebrać. Tóż zaś kożdy dostowo swoji „potwierdzyni otrzimanio przesyłki polecónej” I tak po dwóch godzinach walki z programym pojechali my dudom z kupkóm żodnymu niepotrzebnej makulatury. W dóma stykło  jeszcze yno włónczyć kómputer, zalogować sie i zapłacić podatek przez internet. Bo przeca je program.

Teraz już sie nie dziwia wiadómościóm, że kożdy rok wycinajóm w Puszczy Amazóńskij lasa wielkości Polski, Przeca tak koże program.

Tak se  myśla: rzóndzi jszcze człowiek tymi kómputerami, czy już po mału óne nim.

Fojerman

Kónkurs: Piszymy po naszymu dlo dzieci

1.Towarzistwo Piastowanio Ślónskij Mowy „Danga”, a w jejim mianie Stanisław Neblik „Fojerman”, zaproszo na kónkurs pisanio dlo dziecek po naszymu.

2.Na kónkurs może pisać każdy, kerymu je od 5 – 105 lot.

3.Kónkurs bydzie wyrychtowany we internecie na strónce „Nasza Klasa”, na forum „Piszymy po ślónsku…”

4.Głosować może każdy, kto mo swój oficjalny profil na „Naszej Klasie”.

5.Głosować idzie yno jedyn roz i yno na jedyn tekst.

6.Kónkurs mo pómóc, poszukać nowych ludzi, kerzi poradzóm pisać dlo dziecek.

7.Pisać idzie podle swojigo uznanio: wiersz, bojka, rozprowka, spómniynia, atp.

8. Proszymy Was, żebyście pisali w tradycyjnej ślónskij mowie. Nie bydymy ocyniać ortografije, proszymy ale, coby autor prawidłów, co se ich sóm obiere, używoł jednako i kónsekwyntnie w cołkim tekście.

9. Teksty do kónkursu ni mogóm być dłógsze, jak dwie stróny we formacie A4. Każdymu autorowi pozwolómy przisłać na kónkurs yno jedyn, abo dwa (ni wiyncyj) teksty. Mogóm być pod tym samym, abo inkszym wymyślónym mianym.

10.Tekst mo być nowy, nie śmi być dotónd nigdzi wydany, ani pokozany i ni może być rozgłoszany w inkszym miejscu do kóńca kónkursu.

11.Do kónkursu nie bydóm dopuszczóne teksty, kere łómióm prawo, sóm w nich słowa, abo scyny niedobre dlo dzieci.

12. Eźli taki słabości w tekście znojdymy, spómiarkujymy, abo takich słabości sie doszukómy, to wtedy dómy autorowi przodzi znać i poproszymy go, coby swój tekst zmiyniół. Dopiyro, jak autór nie bydzie chcioł tekst zmiynić, abo nóm nie do żodnej odpowiedzi, to wtedy wykluczymy jego tekst z kónkursu.

13.Każdy, kto pośle tekst, potwierdzo w tyn sposób, że to ón go napisoł i zgodzo sie, wrazić tekst do internetu i żeby przistómpić do kónkursu.

14.Teksty posłać idzie bez internet na adresa Fojermana:  stan09@poczta.onet.pl

15. Teksty trza podpisać wymyślónym mianym, a prawdziwe miano podać Fojermanowi do wiadómości. Prawe Miano autora nie bydzie podane do jawności, a potrzebne je do posłanio nagrody. Skoro kónkurs sie skóńczy, każdy może, ale ni musi, swoji miano wyjawić.

16.Teksty bydóm wystawióne w internecie po przipadkowym porzóndku.

17.Po kónkursie zostawiymy wszystki teksty wisieć na strónie dwa miesiónce, a potym wymażymy wszystko. Każde inksze wykorzystani tekstu musi być domówióne z autorym.

18.Nagrodóm w kónkursie bydzie hónorowe miano „Ślónskigo pisarza dlo dziecek”. Kto go dostanie, rozsóndzóm głosy ludzi z Naszej Klasy.

19.Króm tego, Towarzistwo Piastowanio Ślónskij Mowy „Danga” nagrodzi ksiónżkami trzi najlepsze teksty, wedle uznanio jury „Dangi”. Nagrody poślymy pocztóm.

20.Teksty możecie posywać do 15 kwiytnia 2010.

21.Do internetu wrażymy teksty do 20 kwiytnia 2010.

22.Wybiyrać najlepszy tekst bydziecie mógli od 20 kwiytnia do 20 maja 2010

23.Wyniki podómy do wiadómości do 31 maja 2010

24.Kónkurs może być przerwany w każdej chwili (z ważnej prziczyny). Bydymy sie starali docióngnyć kónkurs do kóńca, podug naszych najlepszych chynci i możliwości.

25.Bydymy radzi, jak docie znać o kónkursie przocielóm, abo rozgłosicie go w internecie, w radiu, abo kaj sie Wóm jeszcze spómni. Nie zachwolejcie jednego tekstu – ludzie majóm se sami wybrać najlepszy, wedle swojigo zdanio.

26.Wiynszujymy fajnej zabawy

Fojerman