Renia – Dieta

Written by Hanys on Styczeń 2nd, 2010

Dieta

Toż po świyntach moji mili

godo do mje połowica,

je żeś jak ta beczka ruby

musisz schudnonć na to licza.

Łod dzisiej Cie prziwachuja,

i jedzyni Ci łoddziela,

nie myś że bydziesz jod woszty

w świontek, piontek czy niedziela.

Zaro Ci wprowadza dieta

a bydzie to dieta cud,

już ty sie doznosz jasności

musisz poczuć co to głod.

Normom na dziyń jedne piwo

choć z Ciebie srogi chłopisko,

możesz kwynkać musisz strzimać

możno spadnie Ci basisko.

Ło kondycjo tyż dbać musisz,

po chlyb pudziesz piechty z rana,

potym zrobisz mi śniodani

nim jo jeszcze z łożka stana.

We antryju stoji koło,

je żeś na pyndzyji przeca,

bydziesz mioł czas pyndalować

a tera po kask Ci leca.

Żebyś sie nie piznoł w gowa

i krziwdy se niy narobioł,

bo sie we wsi bydom śmioli

że chop bułow sie dorobioł.

R.SOBIK

Posted in Renia |

Both comments and pings are currently closed.

Komyntarze wyłonczone.

Lauba Ślonsko