Lauba bajtlom – Ło zajoncach kere czakały na wiosna

Written by Hanys on Listopad 9th, 2009

Ło zajoncach kere czakały na wiosna

Zajonc z cołkom familijom

we lesie pod drzewym sosny,

tak już łod wczora wieczora

czakajom na przijści wiosny.

Chocioż śniegi na polanie

a i stow tyż skuty lodym,

wichura ta beskuryjo

straszy yno nocnym chłodym.

Prziszła wiosna skondś z daleka

prziniosła kosz z geszynkami,

wszystkim dała coś fajnego

potym poszła z zajoncami.

Bo łone na nia czakały

i na szpacyr zaprosiły,

po miedzach, polach i lesie

wiosna wartko łokludziły.

Pokozały wszystki gniozda

i ptokow kadubki nowe,

a to po to, żeby mogły

ptoki chować dziecka zdrowe.

Zaglondały tyż we dziura

kaj myszy fest rozrobiały,

i do ryszawych wewiórek

kere jeszcze w dziupli spały.

Potym pogodały z wiosnom,

żeby ło nich pamiyntała,

i wszystkim zwierzontkom w lesie

jak mogła tak pomogała.

Kejby dała im słoneczko

i dyszczyk z nieba spuściła,

kery podloł by polana

coby sie zazielyniła.

Renia

Posted in Lauba bajtlom |

Both comments and pings are currently closed.

Komyntarze wyłonczone.

Lauba Ślonsko