Fojerman

 
 

Fojerman – Kamela

wtorek, 20 grudnia, 2011

 

 Kamela

Czy wiycie wiela
Pukli mo kamela?
Ja?
Jedyn, abo dwa.

Fojerman, 2011

Fojerman – Kot i kokot

wtorek, 20 grudnia, 2011

2011.10.22

 

Kot i kokot

 

Skoczół kot bez płot

na czyjaś zegroda,

bo tam ze kokotka 

kapała  se woda.

Zejrzoł kota kokot,

co kur tam wachowoł,

jak sie bez plac skrodo

do kałuże z wodóm

i pieje: -Złodzieje!

Kocie, co cie

sam dó nas sprowadzo?

Jo sam je władzóm.

To je nasza woda.

A kot na to: -Szkoda.

Grzbiet postawiół kot

i chnet hop na płot

o suchym pysku.

A było tak blisko…

 

Fojerman

Fojerman – Jegła

wtorek, 20 grudnia, 2011

2011.10.22

 

Jegła

 

Choć mo ucho,

To je gucho,

Bo nie żyje,

Ale szyje,

Modnie i wygodnie,

Jak przestyrczysz nić,

Choć czasym tyż bodnie,

Przipadkowo, w rzić

 

Fojerman

Fojerman – Kozani

wtorek, 20 grudnia, 2011

2011.11.13

 

Kozani

 

Jedyn farorz na kozaniu

Zaczón godać o gorzole…

„To je godka ku szkubaniu”-

Zaczón klupac się po czole

Chłop, co siedzioł pod filorym.

W szynku widzioł mie przed wczorym

I mi zaroz wypómino.

A sóm dziynnie pije wino.

 

Fojerman

Fojerman – Jo cie

wtorek, 20 grudnia, 2011

2011.11.12

 

Jo cie

 

Przi sobocie, wiary docie,

Trza sie zbiyrać ku robocie.

Wy wszyscy odpoczywocie

I myślicie o gupocie,

Na kolanach kota mocie

A po krziżu go halocie,

Abo z wnukym w karty grocie.

Kufki pełne biyra mocie,

Z babóm Klany oglóndocie

i myślicie: jakby jo cie…

A jo musza, w czoła pocie,

Trynować te wody locie.

Potym se to poczytocie,

Chocioz psińco z tego mocie,

Dyć mie przeca dobrze znocie,

Styknie, że sie uśmiychocie.

 

Fojerman

Fojerman – Jajco

wtorek, 20 grudnia, 2011

2011.11.13

 

Jajco

 

Wiersz Jana Brzechwy „Jajko” przetłómaczóny po naszymu

 

Było se roz jajco móndrzejsze od kury.

Kura wychodzi ze skóry,

Prosi, błago, namowio: „Dyć bydź gupsze!”

Ale co zrobić, jak sie keryś uprze?

 

Kura sie fest staro i lecóm ji płaczki,

A óne pado, że je od kaczki.

Kura go prosi, libeźnie i szczyrze:

„Nie trzepej sie tak, bo bydziesz nieświyże.”

A óne prawie sie trzynsie.

I pado, że je od gynsi

 

Kura próbuje mu tłómaczyć,

Że jajca się watrko trzaskajóm raczyj,

A óne udowo gupka,

Że przeca wopno mo szupka.


Kura go grzecznie namowio: „Póć, to cie wysiedza.”

A óne ucieko za miedza.

Kładzie sie na grzynda pusto

I ogłoszo, że bydzie kapustóm.


Kura mu pado: „Nie lotej drógóm,

Smażónka z ciebie tam zrobić mogóm.”

A jajco ji godo na sprzika:

„Na dródze ni ma tyglika:”

Kura woło: „Dej pozór! To je wrawo woda”

A  jajco na to: „Zimno woda! Szkoda!”

Wskoczyło uparte do waru.

I na twardo było zaroz.

 

Fojerman

Fojerman – Na kryzys

wtorek, 20 grudnia, 2011

Na kryzys

Dycko loł żech Wóm sam woda,
Trzimały sie mie gupoty,
Choć mi tego trocha szkoda,
Trza przikryncić tyn kokotek,
Bo bezmała kryzys idzie,
Tóż pozbiyrać trza te graczki.
Jak tak dalij drożeć bydzie,
To loł byda yno płaczki.

Fojerman

Fojerman – limeryki cd

wtorek, 20 grudnia, 2011

O świycyniu.

 

Dwa chłopy z miasta Oświyncim

Do auta wsiedli, choć „wziynci”.

Trefiyli w stróm

I było „bóm”

Na wieczność Panie poświyć im.

 

Na nogi

 

Jedyn synek z miasta Żory,

na nogi” trocha bół chory,

szoł do dochtora,

lot tymu pora.

I zostoł tam do tej pory.

 

 

Przi gupocie

 

Dwa chłopy z miasta Radlin,

na glajzach kable ukradli.

Jak opolali,

pozór nie dali.

Tak gupio na tym wpadli

 

Kostuchna

 

Dwa lómpy z miasta Kostuchna

ściepali się we dwóch na

flaszka brynu.

Dyć przi tymu

dopadła ich „kostuchna”

 

Wola

Jedyn chłop z miasta Wola,

Mioł tako mocno wola,

jak myśloł o tym:

nie do roboty-

do szynku chodzic wola!”

 

 

Biydno Chata

 

Bezdómny chłop z Biydnej Chaty,

w Toto Lotka gro, na raty.

Dłógo gro.

Dłógi mo.

Zapłaci, jak bydzie bogaty

 

Ślónsko baba

 

Zza Brynice jedyn „gość”,

Znany sam bół„oger” doś,

Znod ślónsko baba,

Dała mu rada.

Została yno skóra, kość.

 

O kryce

 

Jedyn starzik z Połómie

Trefiół starka we słómie,

Wlazła do siana,

Tóż slecioł na nia.

Dyć se chłop kryka złómie.

 

Z nadziejóm

 

Jedna frela, ze wschodnich kresów.

Starała sie, skuli okresu.

Dyć dochtór jóm bado,

Bydź przi nadzieji” – pado,

Choć niy mioł w tym interesu.

 

Fojerman

Fojerman – Limy i ryki

wtorek, 20 grudnia, 2011

Na krytyka

Kto pisać chce limeryki,
Niy może boć sie krytyki.
Sława sie marzi,
Dyć tyż sie zdarzi,
Że trza te piwo wypić!

Wilczy bilet

Jedyn wilk w lesie w Wilczy,
Śpiywo w nocy, jak gil, czy
Inakszo jymiouszka.
Tako dostoł nauczka.
Za wyci mo bilet wilczy.

Na kata

Jednego przestympce z Przemyśla,
Co chłopa zabiół, kedyś tam,
Oddali katu.
Tyn pado na to:
Jo to jeszcze przemyśla.

Na motorcyklu

Dwóch łebków z miasteczka Piekło,
Policji na dródze uciykło.
Motorcykel lepszy,
Niż policjant piechty.
Tym razym sie im upiykło.

Stanowczy

Jedyn chłop z miasta Piła,
Zachorowoł był na kiła,
Tóż sie nie pieścił,
Skuli złych wieści
I chycił do rynki piła.

Praktyczny

Jednymu chłopu w Waszyngtónie
Pismo zostało po żónie:
„Byda sie truła”
„Piyrsze kup truła”-
Dopisoł na drugij strónie

Na ciało

Tako jedna ze wsi Niewiadóm,
Nigdy pokój nie do róladóm.
Choć młodo frela,
Ciała mo tela,
Że do dźwiyrzi z nióm nie wjadóm.

Na szaty

Z tego była znano jedna Połómioczka:
Chłopa ożyroka wziyna se ta szwoczka.
Tóż szyła szaty
I w dziyń wypłaty
Jak na jegłach siedziała boroczka.

Na mnicha

Dwóch braciszków z miasteczka Mnich
Trefiół w szynku jedyn mnich,
A że ich w niedziele
Nie widzioł w kościele,
Tóż tak porzóndnie przechrzciół ich.

W Kobyli

W podraciborskij wiosce – Kobyli,
Dycko ludzie mietły robiyli,
Ale bez sztyli,
Bo by sie byli
Tymi sztylami pobiyli.

Limy i ryki

Jo pisza limeryki
I sie nie boja krytyki!
Powiy kto słowo –
Trómfa dostowo:
Pod oczy limy i ryki.

Fojerman

Fojerman – W Gogolinie

wtorek, 20 grudnia, 2011

Wiycie czamu Karolinka uciykła Karlikowi do Gogolina?…

W Gogolinie

Roz Karlikowi na Karolinka,
Że tak powiym, ciykła ślinka,
Dyć po winie,
W Gogolinie,
Zwiyndła mu ta roslinka.

Mioł synek pecha,
Bo choć uciecha
Była tak blisko,
To coś mu zwisło,
Jak sucho wiecha.

Teraz se synek yno spómino.
Keby se fóndnół lepsze te wino,
Porzóndnej marki,
Taki bez siarki,
Bół by se trzimoł z tóm Karolinóm.

Fojerman

Wszystkie elementy graficzne, zdjyncia i teksty som chronione prawym autorskim należoncym do ich autorow!!!