Nasze Dziedziny

Dodoł Hanys, Luty 5th, 2015

  h_mce  Mysłowice – Gerad

Rynek

Mysłowice rynek

Historyczne miasto nad Czornom Przymszom w Trójkoncie Trzech Cysorzy. Fest znane tyż ze Stacji Emigracyjnyj kaj we XIX wieku ludziska z Polski, Rosji, Wengier i Galicji wyjyżdzali „za chlebym” do Hameryki i Zachodnij Europy. Tukej tyż sie urodzioł piyrszy prymas Odrodzonyj Polski – ksiondz kardynał August Hlond. Łoboczyć idzie tyż nojwiynksze w Europie Muzeum Pożarnictwa,  Muzeum Miasta Mysłowice a i blank blisko s tond na Giszowiec i Nikiszowiec.

linia

Rybnik – Baba, Fojerman i Roman

Tychy – Johanek

Johanek – Wszyjsko co mi wiadomo o mojim mieście!

Miastow wybudowanych cołkiym od nowa jest wiela.
Do takich tyż przinoleżom Tychy, w kierych pomiyszkuja od 70-tych rokow minionego wieka. I chocioż kaj sie niy obroca trefiom Gorola, to „mojigo miasta”, bo mi sie zdo, iże tak moga już go mianować, niy pomiyniołbych na rzodne inksze.
Kaj, nikaj do sie jeszcze słyszeć „Nowe Tychy”, jednako takich nima, som same Tychy, zaś łatka „nowe” przilepili kej miasto napoczło sie prowdziwie rozrostać.
Ale po kolyjce!
We 2014 r. Tychy obchodziły 80 rokow od nadanio jim bez Ślonsko Rada Wojewodzko praw gminy miyjskij. Od tego czasu za naszymi miedzami stoły gminy: Paprocany, Urbanowice, Jaroszowice i Wilkowyje. Downi nasi rzondziciele, za sia wziyni taki herb:

joh

Prowdziwe prawa miyjskie Tychy dostały dopiyro ze Nowym 1951 r., ftynczos tyż ku nom doszlusowały: Paprocany i Wilkowyje. A od roku 1973 do Tychow napoczły nadto przinoleżeć: Cielmice, Jaroszowice, Urbanowice i konsek orżniyntego Bieronia Starego, o kiery do dzisiaj jes chaja.
A czamu?
Politycznie lepsij boło, iże nowo fabryka autokow we Tychach powstowo, a niy kajś we Bieroniu.

Ze Szopynic, do Tychow przekludzili my sie wiosnom 1977 roku. Zaś dziyń jak’ech moja ślubno poroz piyrszy tukej prziwlok keby ji pokozać nowo wystawiono wysoko chałpa, spoinom jak dziś.
Ze autobusa wyleźli my we pojstrzodku miasta, bo dalij nic niy jeździło, a ostoł nom jeszcze doś konsek. Dzisioj to ino trzi przistanki, jednako ftynczos to boło hen za torami, za nowym kościołym Jona Krzściciela, kery se stoł som we polu na krańcu Tychow.
I kej my tak leźli, zatroskano ślubno pedziała mi coś, co mi do dzisioj dudni we ucholach: „kajś ty mje chopie wywlok”.

Osiedle na kerym teroski pomiyszkujymy stanyło jeszcze dali ku Kobiorze na placu mianowanym skałkom, tj. na zasutych dołach po downym kamieniołomie. Dobrych noście rokow za nami stoł ino kobiorski las, zaś za niydugo mo stanońć nojnowszy „park wodny”, kaj pudzie sie we prowdziwym piwsku obulać.

linia

Hameryka –   Tereska ze Świyntochłowic.                           Naugatuckwidokw glab jednej z glownych_ulic

Miyjscowość,w kieryj żyja, mo miano NAUGATUCK.Jest łona w stanie Connecticut na wschodnim wybrzeżu,w tzw.Nowyj Anglii.
To małe miasto,w kierym miyszko niycałe 32 tys miyszkańców.Klimat tukej jest subtropikalny,latym momy srogi upały ,z jeszcze wiynkszom wilgotnościom i niy ma czym dychać.Zima zaś jest fest mroźno i czynsto fest śnieżno,jak latoś.
Miasto jest położone po lobu stronach rzyki Naugatuck.Miyjsce to ludziska pieszczotliwie nazywajom „Naugy”.Miyjscowość istnieje lod 1702 roku.Kiedys w czasach prosperity było to przemysłowe miasto,ale terozki jest tzw „sypialniom” dlo klasy średniyj.Nałokoło jest dużo lasów.My z mojim chopym miyszkomy na łosiedlu condominiów ło fajnyj nazwie” Lantern Park”,czyli Latarynkowy Park.To spokojne miasto,żyje sie bezpiecznie.Moji miasteczko w naszym stanie jest unikatowe,bo jest razym skonsolidowane miasto i gmina,mo podwojnych urzyndników ale jedyn zarząd.
W Naugatuck,jak wszyndy w USA poza metropoliami, komunikacjo jest ino po mieście,i aby kajs dojechać trza mieć auto.Auto,to piyrwszo rzecz,jako tu trza mieć,to niy jest żodyn luksus.
W naszyj miyjscowości jest polski kościół pod wezwaniem św.Jadwigi Ślonskij,kaj jest msza po polsku.Szkryflom polski kościół,bo budowali go Poloki i zawdy jest tam ksiondz,kiery godo po polsku.W całym stanie Connecticut przyznowo sie do polskigo pochodzynio 8,3% ludności ale jo myśla,że jest ich wiyncyj.W naszym stanie jest sporo polskich sklepów,wkierych z mojim chopym robiymy sprawunki.

 

 

 

Fojerman – LIMERYKI / O pole i Na nogawice

Dodoł Hanys, Kwiecień 5th, 2014

 

O pole

Jednymu chłopu z miasta Opole,
Somsiod przejechoł kołym bez pole
Toż w jednej chwili,
Boł bez wyntili.
I sie pobili chłopy o pole.

Fojerman

Na nogawice

Jednego chłopa z miasta Glywice,
Co dycko krótki mioł nogawice,
Trefioł kolega.
Wiedzioł, co trzeba –
Kozoł wyplompać woda z pywnice.

Fojerman

 

 

Fojerman – LIMERYKI / Na ptoszka i Na kara

Dodoł Hanys, Kwiecień 5th, 2014

 

Na ptoszka

Jedyn synek z miasta Toszka
Takigo małego mioł „ptoszka”.
Jak zejżoł frela,
To, choć niywiela,
Dyć jednak uros mu troszka.

Fojerman

 

Na kara

Jedyn złodziyj we Piekarach
Dostoł przi spowiedzi kara:
Ponboczka przeprosić,
Wiyncyj niy wynosić.
Toż wzion se ze sobom kara.

Fojerman

 

 

Fojerman – LIMERYKI / Ło ku….ty/Na-kocianka/Bez szacunku/Bez wynikow

Dodoł Hanys, Kwiecień 5th, 2014

 

Ło ku….ty

Jedyn koń z Krolewskij Huty,
Jak mioł owies do żarcio nasuty,
To ziorka zeżar,
A zostawioł plewa.
Taki boł gizd łokuty.

Fojerman

 

Na – kocianka

Do dzisiej sam ludzie spominajom Franka,
W jednej wsi mioł baba, a w drugij kochanka,
Dyć na Dziyń Kobiyt
Dostały obie:
Kochanka – nelka, a baba – kocianka.

Fojerman

 

Bez szacunku

Na farze jedyn kapelonek
Mioł bliski z kucharkom stosunek,
Pryndzyj niż farorz,
Toż go tyż zaroz
cofli – za „mały dlo starszych szacunek”

Fojerman

 

Bez wynikow

Jedyn Stanik kajś w Rybniku,
Chcioł sie chycić limrykow,
Dyć choć sie staroł,
A noce zaroł,
To brakowało wyników

Fojerman

 

 

Fojerman – LIMERYKI / Zakamuflowany i Na banie

Dodoł Hanys, Kwiecień 5th, 2014

 

Zakamuflowany

Jedyn Ślonzok, kajś spod Św. Any,
Prziszoł kedyś dudom nad ranym,
Toż babie pedzioł,
Że ktoś go śledziół
I trocha je „ zakamuflowany”.

Fojerman

 

Na banie

Moj starzik boł richtig baniorzym.
Stowoł, jak ranne zorze,
A przed robotom
Se do kompotu
Kroł tak te banie nożym.

Fojerman

 

 

Tłumaczyni filmów na ślonsko godka

Dodoł Hanys, Styczeń 1st, 2014

Spytalimy sie naszych kamratów ło . I fest my sie uradowali z tych wszyjstkich pomysłów. Wciepujymy ty, kiere sie nom fest podobały.

Wybralimy piyńć, kiere naszym zdanim som nojgryfniyjsze:

  • Jo żech to już kajś widzioł – Deja vu

  • Ło Pierona! – Mamma Mia

  • Szwagier, to je ciynżko sprawa – The Mission Impossible

  • Jak wonio baba – Zapach kobiety

  • Chop-luftmysza – Batman

A tukyj inksze:

  • Kaj leziesz – Quo vadis…

  • Pitło z luftem – Gone With the Wind – Przeminęło z wiatrem

  • Lyjo fachman – Leon zawodowiec

  • Gryfno dziołcha – Pretty Women

  • Sosnowiec – Silent Hill

  • Szmaterlok i Arbajciok – Motyl i Skafander

  • Beboki i Kamraty – Potwory i spółka

  • Na dekiel mu pizło – Psychoza

  • Łonacznik – MacGyver

  • Jo żech je Pónboczek – Jestem Bogiem

  • Chopy w Czornych Ancugach – Men in Black

  • Karlik co sie wyasił – Karol, człowiek który został papieżem

  • Gybis – Szczęki

  • Kosmiczno Haja – Star Wars

  • O dwóch synkach co bachli miesionczek – O dwóch takich co ukradli księżyc

  • Jo je na ja – Jestem na tak

  • Zchacharzone frelki- Galerianki

  • Chop co mo 10 lot do Abrahama – Czterdziestolatek

  • Chop , kiery mo ruła jak żodyn – Niespotykanie spokojny człowiek

  • Ćmi sie – Zmierzch

  • Chachor w blaszoku – Robocop

  • Śmiertka jako klapsznita – Śmierć jak kromka chleba

  • Szlauchy we fligerze – Węże w samolocie

  • Poszkryflano frela – Dziewczyna z tatuażem

  • Łonaczenie na kecioku – Wirujący seks

  • Co poleciało na wiyrch musi zlecieć na douł – Grawitacja

  • Po ptokach – To już jest koniec

  • Seblecone Frelki – Showgirls

  • Karlik, Ty pieronie! – Och Karol

  • Zolyty po ćmoku – Randki w ciemno

Były tyż taki trocha szpetne:

 

Janek-Pszow / Wielkanocny galet

Dodoł Hanys, Marzec 31st, 2013

Wielkanocny galet

Do gynsi prziszła yntka
We Niydziela Palmowo,
Bo miała wielko chyntka
Chwolić sie taszkom nowom.

A gynś na nia wejrzała,
Podprzyła lewe kitko.
– Mosz na boloku ała,
Dyć ta taszka je brzidko.

Skuli gynsi fulanio:
Za dużo jedne słowo.
Godka do szkubanio,
Chaja momy gotowo.

Somsiedzko przijaźń citła,
Gynś yntki niy łodwiedzi.
Czy to je dobry przikład
Dlo cwergowyj gowiedzi?

Łotworzyły sie gały,
Finał mo akcynt mocny:
Dziepiyro sie spotkały,
W galecie Wielkanocnym.

Jan Kaintoch Wielkanoc 2013

 

Tref Wigilijny-Mysłowice 01.2013

Dodoł Hanys, Styczeń 12th, 2013

[nggallery id=1]

troj3

 
Wszystkie elementy graficzne, zdjyncia i teksty som chronione prawym autorskim należoncym do ich autorow!!!