Słowno graczka Fojermana o rymie i rymach :)

Dodoł baba, Grudzień 17th, 2015

Rymy bez rymy

Wy niy wiycie, a jo wiym,
Czamu rymy dostoł rym:
Jo chcioł rymy dać do kupy,
Dyć uciykły na plac strupy
I już jedyn rym bōł chory,
A jo rymy doł do pory,
Tak sie stało ôd tej pory,
Że i drugi rym je chory.
Teraz je najwyższo pora
Iś z rymami do dochtora.
– Dej dochtorze jaki lyki,
Na kucani, smarki, psiki,
Coby zdrowe były rymy,
Bo my rymy sam niy chcymy.
Dochtōr rymy zbadoł chwila,
Doł kożdymu jakoś pila.
– Ryma pilōm je niy rada,
Tōż tako je moja rada:
Niech wypijōm szolka tyju,
A sie pod pierzina skryjōm.
Tak wylyczōł dochtōr rymy,
Ôd tej rymy, tōż już wiymy.
Choć sōm rymy durch do pory,
Niy sōm chore ôd tej pory.
Ryma z nosa już niy leci,
Toż niech ich czytajōm dzieci.

Fojerman

 

Fojerman w Brukseli!

Dodoł baba, Grudzień 8th, 2015

Pod patronatym miasta Rybnika w maju 2015 roku odbyło się ślonski dyktando. Najlepszy w ślonskim pisaniu był nasz  Fojerman, czyli Stanisław Neblik z Rybnika. W nagroda razym z inkszymi Ślonzokami dostoł zaproszyni  do Bruksele. Choć trocha sie boł (bo te roztomajte zamachy…), pojechoł w listopadzie do stolicy Unii Europejskij. Wiyncyj o tym znejdziecie na pewno w „Giskanie Formana”.

A my pochwolymy się fotografijkami naszego Fojermana.

12346555_1201105833234740_4297794139100896599_n12316075_1093998613945737_4909054828339199668_nfojerman_now

 

„Po naszymu, czyli po śląsku”

Dodoł baba, Grudzień 4th, 2015

Jak kożdy rok, trefili my się z nikierymi „Laubiorzami” w Domu Tańca i Muzyki w Zabrzu na konkursie „Po naszymu czyli po śląsku”. Z piynciu nojlepszych jurory wybiyrały latoś strzybnego Ślonzoka, bo to był już 25-ty konkurs! Na binie łozprowioł dlo nos nasz kamrat z Rybnika „Utopek” czyli Bogdan Dzierżawa i Ewelinka Kuśka z Jastrzymbio. Fest im winszujymy!

Udało sie nom w przerwie zrobić fotka z zocnymi Ślonzokami 🙂

 

grupa

 

Po naszymu… – wedle Fojermana

Dodoł baba, Grudzień 4th, 2015

Szuflodka

Mōm sam piykno szuflodka,
Mama dali mi klucz,
A w nij ta Nasza Godka.
Ucz sie jōm synek, ucz!

Tata mi dycko bojoł,
Co starzik mu przekozoł,
A mi, choćby tyn wojok,
Klucza wachować kozoł

Trzimia go kajś we duszy,
Głymboko skryty na dnie,
Tōż żodyn go niy ruszy
I mi go niy ukradnie.

Niy weźnie mi go sōnd.
To jo go trzimia w gości.
Jo klucz od mamy mōm
Z szuflodki od ślōnskości

Fojerman

 

Fojerman jak zawsze na czasie…

Dodoł baba, Grudzień 4th, 2015

Wszyscy

Wszyscy my sōm terrorysty,
Żodyn ni ma świynty, czysty.
Zabić idzie słowym, czynym,
Zabić idzie tyż milczyniym.
Kożdy robi grzychy, krziwdy.
Świat niy bydzie lepszy nigdy,
Podwiyl niy zacznymy zmiyniać
Siebie, we swojich sumiyniach.

Fojerman

 

Tref Interkamratów w Świyntochlowicach – siyrpiyn 2015

Dodoł Gerad Sacherski, Sierpień 7th, 2015

Zaś było piyknie, jak to padali downij – dlo takich chwil werci sie żyć.

Trefili my sie w Muzeum Powstań Ślonskich w kafyju na klachy. Zeszło sie nos 16 kamraci z roztomajtych forow ślonskich. Po zwiydzyniu ekspozycji muzealnyj zasiedli my przy: tyju, kawie (mrorzonyj tyż) i roztomajtych maszkietach. Niyskorzyj było kupa śmiychu i łosprowek.

57885802a5809dm

 

Nasze Dziedziny

Dodoł Hanys, Luty 5th, 2015

  h_mce  Mysłowice – Gerad

Rynek

Mysłowice rynek

Historyczne miasto nad Czornom Przymszom w Trójkoncie Trzech Cysorzy. Fest znane tyż ze Stacji Emigracyjnyj kaj we XIX wieku ludziska z Polski, Rosji, Wengier i Galicji wyjyżdzali „za chlebym” do Hameryki i Zachodnij Europy. Tukej tyż sie urodzioł piyrszy prymas Odrodzonyj Polski – ksiondz kardynał August Hlond. Łoboczyć idzie tyż nojwiynksze w Europie Muzeum Pożarnictwa,  Muzeum Miasta Mysłowice a i blank blisko s tond na Giszowiec i Nikiszowiec.

linia

Rybnik – Baba, Fojerman i Roman

Tychy – Johanek

Johanek – Wszyjsko co mi wiadomo o mojim mieście!

Miastow wybudowanych cołkiym od nowa jest wiela.
Do takich tyż przinoleżom Tychy, w kierych pomiyszkuja od 70-tych rokow minionego wieka. I chocioż kaj sie niy obroca trefiom Gorola, to „mojigo miasta”, bo mi sie zdo, iże tak moga już go mianować, niy pomiyniołbych na rzodne inksze.
Kaj, nikaj do sie jeszcze słyszeć „Nowe Tychy”, jednako takich nima, som same Tychy, zaś łatka „nowe” przilepili kej miasto napoczło sie prowdziwie rozrostać.
Ale po kolyjce!
We 2014 r. Tychy obchodziły 80 rokow od nadanio jim bez Ślonsko Rada Wojewodzko praw gminy miyjskij. Od tego czasu za naszymi miedzami stoły gminy: Paprocany, Urbanowice, Jaroszowice i Wilkowyje. Downi nasi rzondziciele, za sia wziyni taki herb:

joh

Prowdziwe prawa miyjskie Tychy dostały dopiyro ze Nowym 1951 r., ftynczos tyż ku nom doszlusowały: Paprocany i Wilkowyje. A od roku 1973 do Tychow napoczły nadto przinoleżeć: Cielmice, Jaroszowice, Urbanowice i konsek orżniyntego Bieronia Starego, o kiery do dzisiaj jes chaja.
A czamu?
Politycznie lepsij boło, iże nowo fabryka autokow we Tychach powstowo, a niy kajś we Bieroniu.

Ze Szopynic, do Tychow przekludzili my sie wiosnom 1977 roku. Zaś dziyń jak’ech moja ślubno poroz piyrszy tukej prziwlok keby ji pokozać nowo wystawiono wysoko chałpa, spoinom jak dziś.
Ze autobusa wyleźli my we pojstrzodku miasta, bo dalij nic niy jeździło, a ostoł nom jeszcze doś konsek. Dzisioj to ino trzi przistanki, jednako ftynczos to boło hen za torami, za nowym kościołym Jona Krzściciela, kery se stoł som we polu na krańcu Tychow.
I kej my tak leźli, zatroskano ślubno pedziała mi coś, co mi do dzisioj dudni we ucholach: „kajś ty mje chopie wywlok”.

Osiedle na kerym teroski pomiyszkujymy stanyło jeszcze dali ku Kobiorze na placu mianowanym skałkom, tj. na zasutych dołach po downym kamieniołomie. Dobrych noście rokow za nami stoł ino kobiorski las, zaś za niydugo mo stanońć nojnowszy „park wodny”, kaj pudzie sie we prowdziwym piwsku obulać.

linia

Hameryka –   Tereska ze Świyntochłowic.                           Naugatuckwidokw glab jednej z glownych_ulic

Miyjscowość,w kieryj żyja, mo miano NAUGATUCK.Jest łona w stanie Connecticut na wschodnim wybrzeżu,w tzw.Nowyj Anglii.
To małe miasto,w kierym miyszko niycałe 32 tys miyszkańców.Klimat tukej jest subtropikalny,latym momy srogi upały ,z jeszcze wiynkszom wilgotnościom i niy ma czym dychać.Zima zaś jest fest mroźno i czynsto fest śnieżno,jak latoś.
Miasto jest położone po lobu stronach rzyki Naugatuck.Miyjsce to ludziska pieszczotliwie nazywajom „Naugy”.Miyjscowość istnieje lod 1702 roku.Kiedys w czasach prosperity było to przemysłowe miasto,ale terozki jest tzw „sypialniom” dlo klasy średniyj.Nałokoło jest dużo lasów.My z mojim chopym miyszkomy na łosiedlu condominiów ło fajnyj nazwie” Lantern Park”,czyli Latarynkowy Park.To spokojne miasto,żyje sie bezpiecznie.Moji miasteczko w naszym stanie jest unikatowe,bo jest razym skonsolidowane miasto i gmina,mo podwojnych urzyndników ale jedyn zarząd.
W Naugatuck,jak wszyndy w USA poza metropoliami, komunikacjo jest ino po mieście,i aby kajs dojechać trza mieć auto.Auto,to piyrwszo rzecz,jako tu trza mieć,to niy jest żodyn luksus.
W naszyj miyjscowości jest polski kościół pod wezwaniem św.Jadwigi Ślonskij,kaj jest msza po polsku.Szkryflom polski kościół,bo budowali go Poloki i zawdy jest tam ksiondz,kiery godo po polsku.W całym stanie Connecticut przyznowo sie do polskigo pochodzynio 8,3% ludności ale jo myśla,że jest ich wiyncyj.W naszym stanie jest sporo polskich sklepów,wkierych z mojim chopym robiymy sprawunki.

 

 

 

Fojerman – LIMERYKI / O pole i Na nogawice

Dodoł Hanys, Kwiecień 5th, 2014

 

O pole

Jednymu chłopu z miasta Opole,
Somsiod przejechoł kołym bez pole
Toż w jednej chwili,
Boł bez wyntili.
I sie pobili chłopy o pole.

Fojerman

Na nogawice

Jednego chłopa z miasta Glywice,
Co dycko krótki mioł nogawice,
Trefioł kolega.
Wiedzioł, co trzeba –
Kozoł wyplompać woda z pywnice.

Fojerman

 

 
Wszystkie elementy graficzne, zdjyncia i teksty som chronione prawym autorskim należoncym do ich autorow!!!