Renia – Łoczy Matki

Written by Hanys on Maj 25th, 2011

Łoczy Matki

Mamulko we Twojich łoczach
łodbijo sie promiyń słońca
keryn jak krzidła Janioła
budzi kwiotki na łonkach

Mamulko we Twojich łoczach
widza konszczyczek nieba
ciepły jak Twoji rynce
dobry jak sznita chleba

Mamulko we Twojich łoczach
colutki świat sie śmieje
nie straszne mi starania
łod kerych łep siwieje

Mamulko we Twojich łoczch
widziołech pszocio tela
żebyś nim mogła łobdzielić
nie yno mje a dziecek wiela

Toż Ci dziynkuja Mamulko
za te pszajonce łoczy
kere mje kludzom bez życi
jak światło gwiozdki w nocy

Renia

 


Komyntarze wyłonczone.

Wszystkie elementy graficzne, zdjyncia i teksty som chronione prawym autorskim należoncym do ich autorow!!!