Renia – Za to że pszajesz

Written by Hanys on 5 grudnia, 2010


Za to że pszajesz


Ty we cechowni łostałaś sama
i możno markotno Ci trocha bydzie
to wiydz że berkmon Francik z Rybnika
sztwortego grudnia s pukietym przidzie

Za to że wspiyrosz i prziwachujesz
no i pomogosz jak je w potrzebie
nie miarkuj yno że to łod świynta
bo Łon sztujc myśli przeca ło Ciebie

Chociożby leciały ze nieba gromy
i choćby nie wiym co mu sie stało
we swojim sercu mo konsek placu
yno dlo ciebie świynto Barbaro

I jeszcze dlo żonki kerej ślubowoł
bajtlow co za nim ciyngiym kukajom
nie gorsz się że Cie w tym sercu skrywo
berkmony  to przeca tak we kwi majom

A że Jim pszajesz jak żodno inszo
to Łoni wiedzom i docyniajom
beztoż wybrali Cie za Patronka
i w wielki zocy przed światym majom

R.SOBIK

 


Komyntarze wyłonczone.

Wszystkie elementy graficzne, zdjyncia i teksty som chronione prawym autorskim należoncym do ich autorow!!!