Renia – Łobrozek św.Barborki

Written by Hanys on 5 grudnia, 2010

Łobrozek św.Barborki


Starziki robili na grubie
tatulek poszoł w jich ślady
twardzi jako ta ślonsko ziymia
żodyn im nie mog dać rady

Choć była tako jedna
przed Niom zginali kolana
kero ich sztyjc szterowała
na miano Barborka miała

Toż w każdej chałupie berkmona
choć wyblakniynty i stary
wisioł na ścianie s krziżym
łobrozek świyntej Barbary

Łona s tego łobrozka
jakoś tak ckliwie kukała
jakby nie chciała się prziznać
że srogi fresunek miała

I jak ta nasza mamulka
co fest ło dziecka sie staro
i za to że tak nom pszajesz
-Bóg zapłać świynto Barbaro –

R.SOBIK

 


Komyntarze wyłonczone.

Wszystkie elementy graficzne, zdjyncia i teksty som chronione prawym autorskim należoncym do ich autorow!!!