Po Naszymu

...now browsing by category

Teksty i artukuły szkryflane Po Naszymu czyli Po Ślonsku.

 

Fojerman – LIMERYKI / Ło ku….ty/Na-kocianka/Bez szacunku/Bez wynikow

sobota, 5 kwietnia, 2014

 

Ło ku….ty

Jedyn koń z Krolewskij Huty,
Jak mioł owies do żarcio nasuty,
To ziorka zeżar,
A zostawioł plewa.
Taki boł gizd łokuty.

Fojerman

 

Na – kocianka

Do dzisiej sam ludzie spominajom Franka,
W jednej wsi mioł baba, a w drugij kochanka,
Dyć na Dziyń Kobiyt
Dostały obie:
Kochanka – nelka, a baba – kocianka.

Fojerman

 

Bez szacunku

Na farze jedyn kapelonek
Mioł bliski z kucharkom stosunek,
Pryndzyj niż farorz,
Toż go tyż zaroz
cofli – za „mały dlo starszych szacunek”

Fojerman

 

Bez wynikow

Jedyn Stanik kajś w Rybniku,
Chcioł sie chycić limrykow,
Dyć choć sie staroł,
A noce zaroł,
To brakowało wyników

Fojerman

 

Fojerman – LIMERYKI / Zakamuflowany i Na banie

sobota, 5 kwietnia, 2014

 

Zakamuflowany

Jedyn Ślonzok, kajś spod Św. Any,
Prziszoł kedyś dudom nad ranym,
Toż babie pedzioł,
Że ktoś go śledziół
I trocha je „ zakamuflowany”.

Fojerman

 

Na banie

Moj starzik boł richtig baniorzym.
Stowoł, jak ranne zorze,
A przed robotom
Se do kompotu
Kroł tak te banie nożym.

Fojerman

 

Janek-Pszow / Wielkanocny galet

niedziela, 31 marca, 2013

Wielkanocny galet

Do gynsi prziszła yntka
We Niydziela Palmowo,
Bo miała wielko chyntka
Chwolić sie taszkom nowom.

A gynś na nia wejrzała,
Podprzyła lewe kitko.
– Mosz na boloku ała,
Dyć ta taszka je brzidko.

Skuli gynsi fulanio:
Za dużo jedne słowo.
Godka do szkubanio,
Chaja momy gotowo.

Somsiedzko przijaźń citła,
Gynś yntki niy łodwiedzi.
Czy to je dobry przikład
Dlo cwergowyj gowiedzi?

Łotworzyły sie gały,
Finał mo akcynt mocny:
Dziepiyro sie spotkały,
W galecie Wielkanocnym.

Jan Kaintoch Wielkanoc 2013

Fojerman – Było kedyś…

środa, 9 stycznia, 2013

Było kedyś…

Były kedyś taki czasy,
Jak żech mioł lot możno sześ,
Tyroł żech bez pola, lasy.
Grabowino, kaj żeś jes?

Mioł żech tukej swoji gniozdo,
Dzisio rosnōm na nim krze.
Żodym już go sam niy pozno.
Dyć w sercu coś bodzie mie.

Było kedyś taki miejsce,
Niy zostało pō nim nic.
Tōż wspōmniynia tyż se weźcie,
Żeby było lekszy żyć.

Fojerman

Fojerman – Na kamratów

piątek, 25 maja, 2012

Na kamratów

Jednymu chłopu ze wsi Stodoły
Dycko we szynku kamraty przoły,
Jak stawioł piwo.
A teraz krziwo
Kożdy sie dziwo, jak zostoł goły.

 

Fojerman

 

 

Janek-Pszow – Potracony baran

sobota, 31 marca, 2012

Potracony baran.

Poszoł baran mały
Szłapcugiym na hale,
Bo mu zawoniały
We wsi kakałszale.

Za winklym go nyncom
Świyże łoszkrabiny,
Kicholym mu kryncom
Jak ruskie parfiny.

Baran je przigłupym.
Straciył sie, mo stresa.
Jak wyloz z chałupy
Niy wzion dżipiesa.

I chocioż sie stracisz
Choby tyn baranek,
Cie znojdzie twój Tacik
Ulyczy twe rany.

Bo Tacik Niybieski
Podaruje wina.
Połobciyro łezki,
Weźnie na Gościna.

Wielkanoc 2012

Ściskom serdecznie
Janek Pszów Staro Maszyna

Fojerman – O ślimoku, gliździe i krecie

piątek, 2 marca, 2012

O ślimoku, gliździe i krecie

Roz ślimok i glizda poszły tak o weta:
Kery z nich dwóch piyrszy zaleci na meta.
Ta poważno sprawa trza rozsóndzić przeca,
Bezto se na syndzie zawołali kreta.
Ślimok z glizdóm stojóm gotowi na starcie
I kożdy chce ruszyć z miejsca, jak najwarciyj.
Kret im na poczóntek kiwnół swojóm łapóm
i sie tyn maratón już na dobre zaczón.
Z boku posiodały, myszy, bónki, mrowce
I jedyn szmaterlok przisiod tyż na trowce.
Kret, syndzia wyścigu, musi widzieć wszystko,
Bezto se na górka siod, na kretowisko.
A óni tak lecóm przed sia, wiela dychu
I wcale im ni ma żodnymu do śmiychu.
Ślimok sie ślimaczy, kełże wiela umi,
Glizda sie naciongo i kurczy jak gumin.
A tam z boku larmo, bo uciecha majóm
I ptoki na strómach sie z wiyrchu dziwajóm.
Już je prawie kóniec, już brakuje siyły,
Żodyn nie popuści, chce wypruwać żyły.
Z boku keryś wrzeszczy: ”glizda, glizda gazu!”
„Ślimok, ślimok, jeszcze !” A echo powtarzo.
Juz widać ta kryska, jeszcze ze dwa cale,
A tam za wygrano żodyn nie do wcale.
Ślimok sie nacióngo i wystawio czułki,
A glizda jak fedra, jak piynć cali rułki.
Dopadli do mety, minyli łeb w łeb,
A tam przi kibicach, aże wszystko wre.
Czekajóm na kreta, ciekawi, jak diosi,
Aż syndzia wyniki wyścigu ogłosi.
„Kto wygroł, kto piyrszy dolecioł do mety?”
A kret pado na to: „nie wiym, jo je ślepy.”

 

 

 

Fojerman

Janek-Pszow – Świynte dzióbki

wtorek, 20 grudnia, 2011

Świynte dzióbki.

Co piyrsze Mateczka zrobiyła
Jak urodziyła Jezusika?
Czy siymiyniotka uwarzyła?
Najsamprzód dała Mu kusika!

Świynty Józef jak ujrzoł Dziecie
Wtulone w Maryja Dziewica,
Czy uwarzył karpia w galecie?
Niy! Piyrsze całowoł Ich w lica.

A pastuszki co pasły krówki
I na fujarkach gryfnie grali,
Prziniyśli moczka i makówki?
Kaj tam! Wszyskich łobcałowali.

Jak przidziecie nazot z pastyrki
Lećcie pod choinka do żłóbka.
Niy zaczynejcie od wyżyrki!
Świontecznego dejcie se dzióbka!

Jan Kaintoch

Fojerman – Kamela

wtorek, 20 grudnia, 2011

 

 Kamela

Czy wiycie wiela
Pukli mo kamela?
Ja?
Jedyn, abo dwa.

Fojerman, 2011

Fojerman – Kot i kokot

wtorek, 20 grudnia, 2011

2011.10.22

 

Kot i kokot

 

Skoczół kot bez płot

na czyjaś zegroda,

bo tam ze kokotka 

kapała  se woda.

Zejrzoł kota kokot,

co kur tam wachowoł,

jak sie bez plac skrodo

do kałuże z wodóm

i pieje: -Złodzieje!

Kocie, co cie

sam dó nas sprowadzo?

Jo sam je władzóm.

To je nasza woda.

A kot na to: -Szkoda.

Grzbiet postawiół kot

i chnet hop na płot

o suchym pysku.

A było tak blisko…

 

Fojerman

Wszystkie elementy graficzne, zdjyncia i teksty som chronione prawym autorskim należoncym do ich autorow!!!