Po Naszymu

...now browsing by category

Teksty i artukuły szkryflane Po Naszymu czyli Po Ślonsku.

 

Karnawal u Braci w Bajerach

piątek, Luty 24th, 2017

U nos wszyjstko pomylone,
Kozdy loto przeblecony.
To za kaspra, to za zmora,
A niykery za Gorola

Karnawal cza pofajrowac,
Uot czwortku aze do srody.
Troszka popic, pobuoznowac
I yntlich sie wytancowac!

W czwortek to rzondziouy baby,
Szlipse chopom urzynauy.
A w szlstydziyn, wszyjstkie prawie
Z chopeckami na zabawie.

W pyndziauek po jedynosty,
ruszo pochod bez ulice.
Z wozow kamele* smigajom,
dzieciska kupa szpasu majom!

Wto we wtorek jusz wyczyzwiol,
Moze dalij poboznowac.
Tyn co kaca sie przygruchou,
Musi teros sie kurowac.

W sroda, zaros po popielcu,
Chopcy z kobioukom lotajom.
Na Bachusa pogrzebowo stypa….
Wuszt i inksze joduo zbjyrajom.

Jak jusz Bachus w ziymi lezy,
Cza sie piwkiym trocha zmocnic.
I pozwonic mu flaszkami
Coby za rok zajs bou z nami!
________________
*) kamele – bombony kere ciepiom ze wozow
poczas karnawauowego cugu.

Pyrsk i Hellau!
Wasz Marjanek

Ło łosiołku kieryn chciał być w zocy

niedziela, Styczeń 15th, 2017

Wele Betlejym we starej szopie
miyszkoł s bydełkiym łosiołek mały
i tak jak wszyjscy mioł tyż marzynie
żeby podziwioł go kejś świat cały
Niemrawy taki i niypozorny
chcioł żeby insi go w zocy mieli
– Trza mi sie uczyć furgać a wtedy
wszyjscy już bydom ło mje wiedzieli
A że boł łosłym toż niy poradzioł
furgać jak ptoki na nic starani
pszeca kopytka mo a niy krzidła
i tak do końca świata łostanie
-Terazki musza łostać śpiywokiym
wczas rano puda kaj pastuszkowie
pasajom łowce zaśpiywom s nimi
a śpiywać umia kożdy to powiy
Choć ćwiczoł łosioł calutki ranek
i po wieczerzy aż kajś do ćmoka
bez to śpiywani boznujom s niego
że zamiast talyntu dostowo ptoka
Toż prziszoł nazot do swoji szopy
zmochany rykiym usnoł na sianie
kiedy sie zbudzioł przeciyro gały
bo widzi bajtla i słyszy grani
-Śnik to naprowda czy mi sie zdowo
co to za gowiydź i wiela tego
jakiś geszynki jakiś klynkani
to wszystko skuli bajtla małego
Widza że w zocy wielki go majom
szkoda że dlo mje niy je szkryflano
nie byda gorszym jak sie pokłonia
co lepsze zegna przed nim kolano
Tyn bajtel bydzie kiedyś Paniskiym
coż …zowiść ludzko niy mo granicy
bezmała Herod co rzondzioł państwym
na śmierć małego dziyciontka liczy
A że nie wiedzioł kieryn to bajtel
łobejmie po nim tron we prziszłości
toż kozoł zabić malutki synki
żeby dać upust łoszkliwej złości
A kiedy doszły do szopy wieści
ło rzeźli jaki tyn gizd zgotowoł
przbrany Łojciec bajtla z stajynki
droga ucieczki już prziszykowoł
-Niy byda siedzioł po darymnicy
muszą Wom pomoc Jozefku miły
ładuj na moj grzbiet bajtla s mamulkom,
zaryczoł łosioł ze cołki siły
Uciekać musisz życi ważniejsze
a dłogo droga niy straszno pszeca
mom siły tela że przez te pioski
hań do Egiptu drapko pszeleca
I tak rajzowoł łosioł bez miasta
bez miedze i wsie we dnie i nocy
bo pojon biydok że to co robi
to pomoc kiero dlo inszych w zocy

Serce Łojczyzny

niedziela, Styczeń 15th, 2017

Żyjymy pod tym samym niebym
to sama klara ciepło dowo
ta sama ziymia matkom naszom
s tej samej monki chlyb powstowo

Chocioż rozmańto życio droga
po szkartkach historyje kludzi
to yo jedna nasza swojsko
we łoku ckliwe płaczki budzi

To droga to Łojczyzny serce
co pszociym wielkim dlo nas bije
to snopy zboż kominy grubow
to dom i miejsce w kierych żyja

R.Sobik
09.11.2015r.


 

Hoymgruba i lekcje regionalizmu

piątek, Marzec 11th, 2016

Dzisiej w Niewiadomiu spotkało sie pora ludzi (rechtorów, Laubiorzy i inkszych), kierym leży na sercu, żeby szkolorze uczyły sie o swojim regionie na lekcjach we szkole. Był też nasz Fojerman, był Peritus no i był zapowiodany dr Czesak z UJ, kiery mioł tam wyklad. Radzi my som, że od września klasy IV w rybnickich szkołach podstawowych bydom miały jedna lekcja na tydziyń (z tzw. godzin prezydynckich) przeznaczono na nauka o Ślonsku.
A niżyj fotka ze spotkamio na Hoymie. Laubiorz Fojerman to tyn piyrszy z lewej, jakby kto nie pamiyntoł 🙂

misz12802839_551996081640803_5955702259022255798_n12821402_551994601640951_2885531571681447962_n

Do rymu po naszymu abo ślōnski miszmasz

środa, Marzec 9th, 2016

Wszyscy sie sam na Laubie radujymy, że ukozała się w druku  jeszcze jedna ksionżka  napisano po naszymu, czyli w naszej ślonskij godce.  A napisoł  i wydoł jom  nie kto inkszy ino nasz laubowy kamrat Stanisław „Fojerman” Neblik. Gratulujymy!

„Ô czym sam stoji w tej ksionżce? Jak poczytosz, to sie dowiysz. Ô wszyskim, a ô niczym, toż licza na to, że kożdy znojdzie sam coś do sia. Niy trza jom czytać „ôd deski do deski”, styknie poszkartować, trocha sie porozglondać, a poszukać. Tak krotko pedzieć: je sam zebrane we wierszach piynćdziesiont lot mojigo życio (jak tyn czas wartko leci). Pisane to było wiyncyj jak dziesiynć lot, toż możesz uznać, czych sie czego bez te lata nauczoł?”.

Słowo wstympne do ksionżki  napisoł dr Artur Czesak z Uniwersytetu Jagielońskigo, kiery szpecjalizuje sie w polskij godce i od łebka rajcuje go badani roztomajtych dialektów godki  ślonskij i podhalańskij.

Wiym, że kożdy z Was chciołby mieć „Ślonski miszmasz” w doma 🙂 Chocioż ksionżka idzie dostać prawie wszyndzie,  najlepij i najtanij bydzie, jak napiszecie do samego autora na e-maila: stawlik@wp.pl

Eli sie komuś straciył adres zajty z „Giskanom Fojermana”, niech sam kliknie. Tam znejdzie wszystko o autorze i może też do niego naszkryflać do niego  e-milka. Na pewno odpisze 🙂

okladka_miszmasz

Słowno graczka Fojermana o rymie i rymach :)

czwartek, Grudzień 17th, 2015

Rymy bez rymy

Wy niy wiycie, a jo wiym,
Czamu rymy dostoł rym:
Jo chcioł rymy dać do kupy,
Dyć uciykły na plac strupy
I już jedyn rym bōł chory,
A jo rymy doł do pory,
Tak sie stało ôd tej pory,
Że i drugi rym je chory.
Teraz je najwyższo pora
Iś z rymami do dochtora.
– Dej dochtorze jaki lyki,
Na kucani, smarki, psiki,
Coby zdrowe były rymy,
Bo my rymy sam niy chcymy.
Dochtōr rymy zbadoł chwila,
Doł kożdymu jakoś pila.
– Ryma pilōm je niy rada,
Tōż tako je moja rada:
Niech wypijōm szolka tyju,
A sie pod pierzina skryjōm.
Tak wylyczōł dochtōr rymy,
Ôd tej rymy, tōż już wiymy.
Choć sōm rymy durch do pory,
Niy sōm chore ôd tej pory.
Ryma z nosa już niy leci,
Toż niech ich czytajōm dzieci.

Fojerman

Fojerman w Brukseli!

wtorek, Grudzień 8th, 2015

Pod patronatym miasta Rybnika w maju 2015 roku odbyło się ślonski dyktando. Najlepszy w ślonskim pisaniu był nasz  Fojerman, czyli Stanisław Neblik z Rybnika. W nagroda razym z inkszymi Ślonzokami dostoł zaproszyni  do Bruksele. Choć trocha sie boł (bo te roztomajte zamachy…), pojechoł w listopadzie do stolicy Unii Europejskij. Wiyncyj o tym znejdziecie na pewno w „Giskanie Formana”.

A my pochwolymy się fotografijkami naszego Fojermana.

12346555_1201105833234740_4297794139100896599_n12316075_1093998613945737_4909054828339199668_nfojerman_now

Po naszymu… – wedle Fojermana

piątek, Grudzień 4th, 2015

Szuflodka

Mōm sam piykno szuflodka,
Mama dali mi klucz,
A w nij ta Nasza Godka.
Ucz sie jōm synek, ucz!

Tata mi dycko bojoł,
Co starzik mu przekozoł,
A mi, choćby tyn wojok,
Klucza wachować kozoł

Trzimia go kajś we duszy,
Głymboko skryty na dnie,
Tōż żodyn go niy ruszy
I mi go niy ukradnie.

Niy weźnie mi go sōnd.
To jo go trzimia w gości.
Jo klucz od mamy mōm
Z szuflodki od ślōnskości

Fojerman

Wszystkie elementy graficzne, zdjyncia i teksty som chronione prawym autorskim należoncym do ich autorow!!!