Janek-Pszow

...now browsing by category

Janek-Pszow – Jan Kaintoch z Pszowa

 

Janek-Pszow / Wielkanocny galet

niedziela, 31 marca, 2013

Wielkanocny galet

Do gynsi prziszła yntka
We Niydziela Palmowo,
Bo miała wielko chyntka
Chwolić sie taszkom nowom.

A gynś na nia wejrzała,
Podprzyła lewe kitko.
– Mosz na boloku ała,
Dyć ta taszka je brzidko.

Skuli gynsi fulanio:
Za dużo jedne słowo.
Godka do szkubanio,
Chaja momy gotowo.

Somsiedzko przijaźń citła,
Gynś yntki niy łodwiedzi.
Czy to je dobry przikład
Dlo cwergowyj gowiedzi?

Łotworzyły sie gały,
Finał mo akcynt mocny:
Dziepiyro sie spotkały,
W galecie Wielkanocnym.

Jan Kaintoch Wielkanoc 2013

Janek-Pszow – Potracony baran

sobota, 31 marca, 2012

Potracony baran.

Poszoł baran mały
Szłapcugiym na hale,
Bo mu zawoniały
We wsi kakałszale.

Za winklym go nyncom
Świyże łoszkrabiny,
Kicholym mu kryncom
Jak ruskie parfiny.

Baran je przigłupym.
Straciył sie, mo stresa.
Jak wyloz z chałupy
Niy wzion dżipiesa.

I chocioż sie stracisz
Choby tyn baranek,
Cie znojdzie twój Tacik
Ulyczy twe rany.

Bo Tacik Niybieski
Podaruje wina.
Połobciyro łezki,
Weźnie na Gościna.

Wielkanoc 2012

Ściskom serdecznie
Janek Pszów Staro Maszyna

Janek-Pszow – Świynte dzióbki

wtorek, 20 grudnia, 2011

Świynte dzióbki.

Co piyrsze Mateczka zrobiyła
Jak urodziyła Jezusika?
Czy siymiyniotka uwarzyła?
Najsamprzód dała Mu kusika!

Świynty Józef jak ujrzoł Dziecie
Wtulone w Maryja Dziewica,
Czy uwarzył karpia w galecie?
Niy! Piyrsze całowoł Ich w lica.

A pastuszki co pasły krówki
I na fujarkach gryfnie grali,
Prziniyśli moczka i makówki?
Kaj tam! Wszyskich łobcałowali.

Jak przidziecie nazot z pastyrki
Lećcie pod choinka do żłóbka.
Niy zaczynejcie od wyżyrki!
Świontecznego dejcie se dzióbka!

Jan Kaintoch

Janek Pszow – PRANIE FUZEKLI

środa, 22 czerwca, 2011

spiywac na melodia ” czas relaksu, relaksu, relaksu to czas”PRANIE FUZEKLI

1.Kiedy wysiedna juz z merca Alojza
mom klara na puklu i blank czysty luft
Heringi jak gupie po wodzie skokajom
Plynymy do Portoferajo.

Ref.: Nabombiymy sie dzisiej jak perszingow sto
Cynia, Maniek, Eweczka i jo.

2.Bajtle lot rana se klepiom na dziobie
ze tyz pieronie niy boli ich dziub
co drugi na londzie szpanuje komorom
bo som my juz w Porto Azzuro.

ł.Na wieczor w motorku wysiadla nom plompka
kapitan bajstluje po cmoku na dnie
a jo mu nad lepom blinduja taszlampom
Bydymy w Marina di Campo.

4.We Francje na zolyty sie godo amory
w Pepikach na amory godo sie laska
a u nos na laska godo sie kryka
zakochom sie w Bastia-Korsyka.

5.Yno mi pudla brakuje z antynom
tesciowo na fuzbal zaglondo jo niy
mozno dzis buda keprym szczelyl tyn Badzio
obejrzij sie to Macinagio.

6.Niykierzi sie kompiom colkiym po nagu
chyba na batki niy styko ich pra
moj starzik by pedziol to som czyste jaja
zachwyco Isola Capraia.

7.Koscielne piesniczki spiywolech w niydziela
alech niy poszol porzykac na mszo
w hefcie u Ponboczka krycha mom czorno
Prziwito nos zachod w Livorno.

8.Caly tyn urlop mi sie fest podobo
niy piera fuzekli niy pucuja szyb
No a najbardzij mje cieszy jak zonka
godo tak slodko do Bronka.

Mozno kiedys Wom to zaspiywom
usciski dla kochanyj Danki


janek Pszow Staro Maszyna

Janek Pszow – Schraniani w Wielkim Tydniu

wtorek, 19 kwietnia, 2011

Schraniani w Wielkim Tydniu.

Szwigra fuzekle posztopowała
I przi robocie sie zapajała.
Nabiglowała cołki szrank portek,
Zamiast porzykać iść w Wielki Czwortek.

Oma nom zoki posztrykowała
Cołki dziyń slecioł, niy porzykała.
Niby mo gyszynk kożde z dzieciontek,
Cóż jak przelecioł i Wielki Piontek.

Wzion na klopsztanga tepichy ujec,
Mo siyła klupać to wypucuje.
Potym sztrajchowoł z garażu wrota
I niy porzykoł w Wielko Sobota.

Życza cobyście niy zapomnieli
Ło świyntowaniu Wielki Niydzieli!
Dyć schraniani niy zajonc niy citnie
a Bożo Miłość – z wiosnom zakwitnie!!!

Janek Pszów Staro Maszyna
Wielkanoc 2011

Janek-Pszow – Świynty Zefliczku

sobota, 18 grudnia, 2010


Świynty Zefliczku


To tyś posłuchoł Janioła godki,
Świynty Zefliczku, tatulku prawy.
Maryjiś szynknył weselne kwiotki
I Wom Ponboczek pobłogosławił.

Świynty Zefliczku, fest Ci dziynkuja
Żeś Dziecionteczko ratowoł w nocy.
Uciyk spod rynki Heroda – zbója,
Z Nojświyntszom Pannom – to momy w zocy.

Juzaś przifurgnył Janioł ciciaty:
Nazot z Egiptu, mil piechty z dwiesta.
Świynty Zefliczku – tyś wzorym taty,
Boś do Ponboczka pokozoł cesta.

Choć żeś na puklu mioł Abrahama,
Świynty Zefliczku, choć miołżeś glaca!
To Przenajświyntszo nojlepszo Mama,
Niy mogła erbnyć lepszego szaca!

Boże Narodzenie 2010

Uściski serdeczne Janek

Janek Pszow – Zgniyły Zajonc i robotne Anioły ( pszowscy wikarzy)

środa, 31 marca, 2010


Zgniyły Zajonc i robotne Anioły ( pszowscy wikarzy).

Zajonczek sie niy chyto roboty:
Wcino modro kapusta, rolada.
Musi za niego przez poł soboty
Gyszynki nosić – Aniołek Adam!

Byś sie Zajonczka niy doprosił
Bo tak po prowdzie nic sie niy staro.
Gyszynki bajtlom wdycki przinosi
Dzielny wojownik – Aniołek Karol!

Anioł se furgo bo mo krzidełka
W jedna sekunda gno z kilomyjter.
Prujonc  z gyszynkiym ścignie orełka
Taki je wartki – Aniołek Pyjter!

Niy dźwignie miecha jak ni mo ronczek
I tłumacz małym Krzysiom i Madziom,
Że gyszynków niy nosi Zajonczek
Yno pulchniutki – Aniołek  Radzio!

Jan Kaintoch – Wielkanoc 2010

Janek – Jezusku, słoneczko…

piątek, 18 grudnia, 2009

Jezusku, słoneczko…

Jezusku, słoneczko,
Topisz serca z lodu.
Mlyczka dom Ci deczko,
Cobyś ni mioł głodu.

Jezusku, serduszko,
Dziecino malutko.
Chronia Cie pieluszkom,
Cobyś mioł suchutko.

Jezusku, kruszynko,
Nojmilejsze kwiotko.
Tula Cie pierzinkom,
Cobyś nynoł słodko.

Jezusku, Ty lyczysz
Kożdo ziymsko haja.
Nasze krziże smyczysz.
Wiysz jak jo Ci przaja!

Janek Pszów Staro Maszyna  Boże Narodzenie 2009

Janek – W Betlejym je ciepło…

środa, 16 grudnia, 2009

W Betlejym je ciepło…

W Betlejym je ciepło, choć grudziyń,
Bo Gwiazda fest błysko znad szopy,
Zwiastuje nowina ło cudzie.
A nom marznom rynce i stopy.

W Betlejym je ciepło, choć zima.
Skłodajom fojera pastuszki,
By w żłóbku niy zmarzła dziecina.
A nom marznom nosy i uszki.

W Betlejym je ciepło, choć nocka,
Bo cołko stajynka jaśnieje.
Jezusek rozdowo Łask mocka.
A u nos za łoknym zawieje.

Choć zima, mroz czasko, śniyg leży,
Nom może być ciepli, choć wieje:
My yno muszymy uwierzyć,
Że Bóg sie narodził w Betlejem.

Boże Narodzenie 2005 – Jan Kaintoch

Janek – Ślimoki wandrujom do nieba

środa, 16 grudnia, 2009


Ślimoki wandrujom do nieba

Do Ciebie ślimoku

Tyż  Pon Jezus przidzie.

Jak żeś żył po ćmoku,

Świyntym zaroz bydziesz.

I do Ciebie frelko

Dzieciątko zawito.

Niesie radość wielko,

A staranie cito.

Dzieciątko Ci tysionc

W sercu gwiazd zapoli.

Cobyś przoł Hanysom,

I kochoł goroli.


Boże Narodzenie 2002 – Jan Kaintoch

Wszystkie elementy graficzne, zdjyncia i teksty som chronione prawym autorskim należoncym do ich autorow!!!